धनगढीको ऐश्वर्य बहुमुखी क्याम्पसमा स्ववियुद्वारा तालाबन्दी
धनगढी: धनगढीस्थित ऐश्वर्य बहुमुखी क्याम्पसमा फर्निचर खरिद प्रक्रियामा अनियमितता भएको आरोप लागेपछि विवाद चर्किएको छ। क्याम्पस प्रशासनले सार्वजनिक खरिदसम्बन्धी प्रचलित नियम र पारदर्शितालाई बेवास्ता गरेको भन्दै स्वतन्त्र विद्यार्थी युनियनले आज क्याम्पस प्रशासन र क्याम्पस प्रमुखको कार्यकक्षमा तालाबन्दी गरेको छ।
स्ववियु अध्यक्ष दिपक राज भट्टद्वारा जारी विज्ञप्तिअनुसार क्याम्पसकाे हलका लागि फर्निचर खरिद गर्दा प्रतिस्पर्धात्मक प्रक्रिया अपनाइएको छैन। कोटेशनसमेत नखोली काम अघि बढाइएको आरोप लगाउँदै यसले आर्थिक पारदर्शिता र संस्थाको विश्वसनीयतामाथि गम्भीर प्रश्न उठाएको उनले बताए।
क्याम्पसमा गत माघमा सञ्चालन गरिएको राष्ट्रिय प्राज्ञिक सम्मेलनका लागि हल व्यवस्थापन गर्न ९९ हजार रुपैयामा एक सय वटा कुर्सी खरिद गरिएको थियो। क्याम्पसको सार्वजनिक खरिद नियमावलीको दफा (८६) खरिद सम्बन्धी व्यवस्थाको उप दफा (३) मा ५० हजार भन्दा माथि ५ लाख रुपैया सम्मको माल समान तथा सेवा गरिद गर्दा क्याम्पस प्रमुखले खरिद एकाईको सिफारिसमा १५ दिनको म्याद राखी सिल कोटेशन मार्फत खरिद गर्नुपर्ने व्यवस्था छ। उक्त नियम मिचेर अपारदर्शी रुपमा सामान खरिद गरिएको स्ववियु अध्यक्ष भट्टले बताए।
भट्टले पटक–पटक यस विषयमा ध्यानाकर्षण गराए पनि कुनै सुनुवाइ नभएको गुनासो गरेका छन्। 'हामीले क्याम्पस प्रमुखसंग कुरा गर्दा उल्टै म क्याम्पसकाे बाेस हुँ, मेरा स्टाफहरुलाई जेसुकै निर्देशन पनि दिन्छु भनेर अभिव्यक्ति दिनुभयो' उनले भने।
कोटेशनसम्बन्धी विवरण सार्वजनिक गर्न माग गर्दा क्याम्पस प्रमुखले तीन दिनभित्र उपलब्ध गराउने आश्वासन दिए पनि त्यसअघि नै तालाबन्दी गरिएको उनले बताएका छन्।
स्विवयुले फर्निचर खरिद प्रक्रियाको छानबिन गर्न, गैरकानुनी निर्णय खारेज गर्न, दोषीमाथि कारबाही गर्न तथा आगामी दिनमा सबै खरिद प्रक्रिया पारदर्शी र नियमअनुसार सञ्चालन गर्न माग राखेको छ। माग पूरा नभए थप कडा आन्दोलन गर्ने चेतावनी पनि दिइएको छ।
उता क्याम्पस प्रमुख नरेश पन्तले भने आफूहरूले सबै प्रक्रिया पूरा गरेरै खरिद गरिएको दाबी गरेका छन्। विद्यार्थीहरूलाई तीन दिनभित्र विवरण दिने जानकारी दिँदासमेत तालाबन्दी गरिएको भन्दै उनले असन्तुष्टि व्यक्त गरेका छन्। साथै, चैत ७ गते हुने वार्षिक उत्सवको तयारी भइरहेको बेला यस्तो कदम चालिनुले कार्यक्रम प्रभावित पार्ने उद्देश्य देखिएको उनको भनाइ छ।
जयन्त सिंह भाट दिनेश खवरका संवाददाता हुन। उनले समसामयिक विषयमा कलम चलाउछन्।