नीति तथा कार्यक्रममाथि संसदमा पक्ष–विपक्षबीच तीखा बहस
सरकारले प्रस्तुत गरेको नीति तथा कार्यक्रममाथि प्रतिनिधिसभामा सत्ता पक्ष र विपक्षी दलका सांसदबीच तीखा बहस भएको छ। विपक्षी सांसदहरूले कार्यक्रमलाई परम्परावादी र अस्पष्ट भएको टिप्पणी गरेका छन् भने सत्तारूढ दलका सांसदहरूले कार्यक्रमको बचाउ गरेका छन्।
बिहीबार प्रतिनिधिसभा बैठकमा भएको छलफलमा अर्जुननरसिंह केसी ले सरकारलाई प्रजातान्त्रिक मूल्य र मान्यताविपरीत नजान सुझाव दिए। उनले नीति तथा कार्यक्रममा केही सकारात्मक पक्ष भए पनि अधिकांश पुरानै विषय दोहोरिएको र कार्यक्रम परम्परागत सोचभन्दा माथि उठ्न नसकेको धारणा राखे। संसदको बहुमत नै अन्तिम सत्य नभएको हेक्का राख्न उनले सरकारलाई सुझाव दिए।
त्यस्तै पद्मा अर्याल ले सरकारको नीति तथा कार्यक्रम स्पष्ट र दिशानिर्देशात्मक हुन नसकेको टिप्पणी गरे। राष्ट्रकै मार्गदर्शक दस्तावेज भएकाले नीति तथा कार्यक्रममाथि टिप्पणी गर्नु विरोध नभई जिम्मेवारी भएको उहाँको भनाइ थियो। उनले “समृद्ध नेपाल, सुखी नेपाली” को अवधारणा कार्यक्रमबाट हटाइनु उचित नभएको बताए।
युवराज दुलाल ले नीति तथा कार्यक्रममा समाजवादउन्मुख अर्थतन्त्रको विषय उल्लेख नगरिएको भन्दै सरकारको कार्यक्रम दिशाहीन हुन नहुने धारणा राखे।
सत्तारूढ दल राष्ट्रिय स्वतन्त्र पार्टी का सांसद विपिन कुमार आचार्य ले भने नीति तथा कार्यक्रम सकारात्मक रहेको उल्लेख गर्दै यसलाई अझ प्रभावकारी र परिणाममुखी बनाउनुपर्ने बताउनुभयो। नीति निर्माण प्रक्रियामा सांसदहरूको भूमिकालाई थप प्रभावकारी बनाउनुपर्ने उनको भनाइ थियो।
छलफलका क्रममा सांसदहरूले संविधान कार्यान्वयन, सङ्घीयताको सुदृढीकरण र नागरिकमैत्री शासनलाई सरकारको प्राथमिकतामा राख्नुपर्नेमा समेत जोड दिएका थिए।
