जोगबुडा प्रादेशिक अस्पतालमा २९ जना कर्मचारीका लागि आवेदन खुल्यो
डडेल्धुराः सुदूरपश्चिम प्रदेश अन्तर्गत जोगबुडा प्रादेशिक अस्पतालले विभिन्न पदमा कर्मचारी आवश्यक रहेको सूचना जारी गरेको छ। आर्थिक वर्ष २०८१/०८२ का लागि करार सेवामा पदपूर्ति गर्न अस्पतालले खुला प्रतिस्पर्धामार्फत आवेदन माग गरेको हो।
सूचना अनुसार मेडिकल अधिकृत (आठौं तह) पदमा ४ जना माग गरिएको छ। यसका लागि मान्यता प्राप्त शिक्षण संस्थाबाट एमबिबिएस उत्तीर्ण गरी नेपाल मेडिकल काउन्सिलमा दर्ता भएको हुनुपर्ने उल्लेख गरिएको छ।
त्यस्तै, हेल्थ असिस्टेन्ट (पाँचौं तह) ५ जना, स्टाफ नर्स (पाँचौं तह) १२ जना, फार्मेसी सहायक २ जना, ल्याब टेक्निसियन ३ जना, रेडियोग्राफर १ जना तथा कम्प्युटर अपरेटर २ जनाको माग गरिएको छ। यी सबै पदका लागि सुदूरपश्चिम प्रदेश लोक सेवा आयोगको नियमअनुसार योग्यता पुगेको हुनुपर्नेछ।
आवेदन दिने उम्मेदवारको उमेर सहायक स्तरका लागि १८ वर्ष पूरा भई ४० वर्ष ननाघेको तथा अधिकृत स्तरका लागि २१ वर्ष पूरा भई ३५ वर्ष ननाघेको हुनुपर्ने छ। आवश्यक कागजातसहित सूचना प्रकाशित मितिले १५ दिनभित्र दरखास्त दिन सकिने जनाइएको छ।
दरखास्त शुल्क अधिकृत तहका लागि एक हजार र सहायक तहका लागि पाँच सय तोकिएको छ। आवेदन फाराम सुदूरपश्चिम प्रदेश लोक सेवा आयोगको वेबसाइटबाट डाउनलोड गर्न सकिने र आवश्यक कागजातसहित इमेलमार्फत पनि पठाउन सकिने व्यवस्था गरिएको छ।
अस्पताल प्रशासनका अनुसार विस्तृत जानकारीका लागि तोकिएका सम्पर्क नम्बरमार्फत बुझ्न सकिनेछ। साथै, दरखास्त पेश गर्ने अन्तिम मिति चैत १५ गते तथा सम्पर्क मिति चैत १६ गते तोकिएको छ।
