रास्वपा नेता शैलेशकुमार सिंहमाथि आक्रमण भएको दाबी
धनगढीः राष्ट्रिय स्वतन्त्र पार्टी (रास्वपा) का नेता शैलेशकुमार सिंहले सुदूरपश्चिम प्रदेश महाधिवेशनबाट घर फर्किने क्रममा आफूमाथि आक्रमण भएको दाबी गरेका छन्।
सामाजिक सञ्जालमार्फत मंगलबार राति सिंहले ७–८ जनाको समूहले योजनाबद्ध रूपमा आफूलाई सांघातिक आक्रमण गरेको तथा साथमा रहेका सामानसमेत लुटेर लगेको बताएका हुन्।
“आज अधिवेशनबाट घर फर्किने क्रममा ७–८ जनाको समूहले ममाथि योजनाबद्ध रूपमा सांघातिक आक्रमण गरेको छ। आक्रमणकारीहरूले मसँग रहेको सामानसमेत लुटेर लगेका छन्,” उनले सामाजिक सञ्जालमा लेखेका छन्।
सिंहले उक्त घटनालाई लोकतान्त्रिक अभ्यास र राजनीतिक सहभागितामाथिको आक्रमणको संज्ञा दिँदै घटनाको घोर निन्दा गरेका छन्। साथै दोषीमाथि कानुनी कारबाही गर्न सम्बन्धित निकायसँग माग गरेका छन्।
धनगढीमा जारी रास्वपाको सुदूरपश्चिम प्रदेश महाधिवेशनकै क्रममा भएको भनिएको उक्त घटनाबारे प्रहरीले भने हालसम्म औपचारिक प्रतिक्रिया सार्वजनिक गरेको छैन। घटनाको वास्तविकता, कारण र संलग्न व्यक्तिबारे थप विवरण आउन बाँकी रहेको छ।
प्रहरीको आधिकारिक धारणा तथा थप अनुसन्धानको निष्कर्ष सार्वजनिक भएपछि घटनाबारे थप स्पष्ट हुने अपेक्षा गरिएको छ।
