ए दादा अच्याल कि गरन्छै ?

-बिन्दु चन्द 

पैलिमाई त छाकाला सम्म सिरन्थेइ ब, 
जाँ लायो वाईँ बैरन्थेइ ब

ए दादा अच्याल कि गरन्छै ? 

कोरुङ्याईनि लुकायो गुण, मिसिरि चोरबरे खान्थेई, घर भण्या हाण्लो भणन्थेइ ब, 

ईजाले जाणिहाल्या बरेलै हमलाइ हकाराउन्थेई, यी भाप्पाओरनले खाया हो मुइले नाई खाया भणबरे, 

ए दादा अच्याल कि गरन्छै ? 

गोला गया बेला अन्टि खेल्लामाई, गुच्चा खेल्लामाई, सलैका बट्टा चिरबरे तास खेल्लामाई रन्थेई, 

बाकारा राउँन्थ्या, गाल्दिनेई काखिका सरखान गन्थ्या नाई जाणन्थेइ, घर आईबरे आँजि हमैलाई ईजा हात हणाउन्थेई ब,

ए दादा अच्याल कि गरन्छै ? 

खानमिन्जा थलामाई है ट्वाप्प भात चोरन्थेई, 

उल्टा चुलाईन बस्या ईजालाइ, ओ ज्या हेर त धै यीनन् त खचबच गद्दार्यान भणन्थेई,

ईजा बौलिबरे आउन्थ्या बलमुणो समाई, फुट्ट उठीबरे मारि गिरिरिरिरि दौणबरे भाजन्थेई ब 

ए दादा अच्याल कि गरन्छै ? 

रात किताब पड्डिमिन्जा कोप्पिलाइ मुन्डो लाईबरे हमरीनतिर अन्यारोे बनाइदिन्थेई,

सद्दिले पण दा भण्याबरे काला बाकाराई कोदो बुकायाई जानि फलफलफलफल पणन्थेई ब 

ए  दादा अच्याल कि गरन्छै ? 

स्कुल जानमिन्जा सपहै अइतिर उठबरे बिनहातुख धोयाई चप्पल चोरिबरे हालिलैजान्थेई,

कति दिनत मुई बिन चप्पलै स्कुल झाईर्याेउ 

ए दादा अच्याल कि गरन्छै ? 

जसि ब लहर आँउथि उन्ज्या त, पोईल हिट्टि लागू भण्या मुण चलन्थ्यो,

जब तुई फाटाई गरन्थेई ईजा हमलाई गालिदिन्थि,

ए दादा अच्याल कि गरन्छै ? 

छिन्क्या गर्याबरे सिँगान हातभर्रि आउथ्यो रे मारि कमेजका बाउलानमुणि घोसण्न्थेइ 

आब त तेरा लै चेला चेलि उहिबेला हम जसा  होइग्या 

ए दा अच्याल कि गरन्छै ? 

कभै फोनै लै नाई गद्दै,  हमरिन सोराई लै नाई लाग्गि कहब धेकेई तुईलाई त 

नभेट्या लै कै साल होइग्या फोन गद्दै धैँ एक्कै फेरा, मुई जाण्या मन लागिरैछ 

एई दादा अच्याल कि गरन्छै ?

हमले केइ गद्दाहै पैल्ली ईजाला झट्ट घाँत गरिहालन्थेई ब,

आब त तेरा चेला चेलि लै पाज गद्दा हुनाहुन, खचबच, काला कनौट गद्दा हुनाहन कैलाई घाँत गरन्छै 

बताउनै धैँ जाण्या मन लागिरै छ 

ए दादा अच्याल कि गरन्छै ? 

रिसाइए जन हाँ भाप्पाले इसो भण्यो भणीबरे, मुईलाई त भौत सोराई लागन्छे भाइ र्यानु की गरु, तबै इसाई बिलौना पोख्खौ

तोईलाई लागन्छे ब नाइ हमरी सोराई ? लाग्याबरे कि गरन्छै ?

बताउनै धैँ मुइलाई जाण्या मन लागिरैछ 

ए दादा अच्याल कि गरन्छै ?