महाकालीमा बेपत्ता बालकलाई खोज्दै गोताखोर
दार्चुलाः सोमवार महाकाली नदीमा पौडी खेल्ने क्रममा बेपत्ता भएका बालक खोज्न सशस्त्र प्रहरी बलले गोताखोर परिचालन गरेको छ।
महाकालीमा पौडी खेल्ने क्रममा व्यास गाउँपालिका–६, पन्तोलीका १६ वर्षीय धीरजसिंह धामी बिहीबारसम्म फेला नपरेको जिल्ला प्रहरी कार्यालय दार्चुलाका प्रमुख, प्रहरी नायब उपरीक्षक गौरव महतले जानकारी दिए।
बेपत्ता भएकै दिनदेखि सुरक्षाकर्मी र स्थानीयले खोजी गर्दै आए पनि फेला नपरेपछि सशस्त्र प्रहरी बलले गोताखोर परिचालन गरेको जनाएको छ। बिहीवार बिहान सुदूरपश्चिम प्रदेश अत्तरिया बाहिनीबाट सशस्त्र प्रहरी बलको गोताखोर परिचालन गरिएको सशस्त्र प्रहरीले जनाएको छ।
जिल्ला सदरमुकाम खलङ्गामा कोठा गरी बस्ने धीरज धामी पौडी खेल्ने क्रममा सदरमुकामस्थित महाकाली नगरपालिका–५, बसपार्क क्षेत्रबाट बेपत्ता भएका थिए। साथीहरूसँग पौडी खेल्न गएका धीरज नदीमा डुबेर बेपत्ता भएका हुन्। उनीसँगै गएका उनका दुई जना साथी भने सकुशल रहेको प्रहरीले जनाएको छ। उनी सदरमुकामस्थित महेन्द्र माध्यमिक विद्यालय खलङ्गामा कक्षा ९ मा अध्ययनरत छन्।
