पोर्चुगलमा बिस्केट जात्रा मनाइँदै
पोर्चुगलः युरोपेली मुलुक पोर्चुगलमा रहेका नेवार समुदायले ऐतिहासिक तथा सांस्कृतिक महत्वको पर्व बिस्केट (बिस्का) जात्रा मनाउने भएका छन्।
नेवाः समाज पोर्चुगलको आयोजनामा यही १५ अप्रिल तारिख (आगामी वैशाख २ गते) का दिन राजधानी लिस्बनमा यहाँ रहेका नेवार समुदायले भव्यताका साथ बिस्केट जात्रा मनाउने भएका हुन्।
नेवारी रीतिरिवाज, भाषा, कला र धर्मसंस्कृतिको संरक्षण र प्रवद्र्धन गर्ने उद्देश्यअनुरुप नयाँ वर्ष २०८३ को शुभकामना आदानप्रदानसहित भव्यताका साथ बिस्केट जात्रा मनाउन लागिएको समाजका अध्यक्ष अमृतरत्न शाक्यले जानकारी दिए। उनका अनुसार कार्यक्रममा नेवारी धर्म–संस्कृति र परम्पराअनुसार भैरवको विशेष पूजाआराधना गरिनेछ।
साथै समयबजी, टीकाटाला, ध्वजा र सगुनसहित एकापसमा शुभकामना आदानप्रदानको कार्यक्रम तय गरिएको छ । नेवारी कला र संस्कृतिको माध्यमबाट पोर्चुगलमा रहेका नेवार समुदायबीच आपसी सहकार्य, मेलमिलाप र भाइचारालाई थप प्रगाढ बनाउन जात्राको आयोजना गरिएको उनले बताए।
सो अवसरमा लाखे नाच, धिमे बाजा, बाँसुरी धुनलगायतका नेवारी कला र संस्कृति झल्कने खालका सांस्कृतिक झलकहरू प्रस्तुत गरिने जनाइएको छ । लिस्बनको आरोइसस्थित ग्रिल एन्ड चिल रेस्टुरेन्टको हलमा हुने उक्त कार्यक्रममा सहभागी हुन समाजले पोर्चुगलवासी नेवार समुदायलाई विशेष आग्रह गरेको छ।