कैलालीका दुई स्थानमा जुवा खेल्दै गरेका २१ जना पक्राउ

धनगढीः कैलालीका दुई छुट्टाछुट्टै स्थानबाट जुवातास खेलिरहेको अवस्थामा प्रहरीले २१ जनालाई पक्राउ गरेको छ।

जिल्ला प्रहरी कार्यालय कैलालीका अनुसार धनगढी उपमहानगरपालिका–५ तारानगरमा जुवातास खेलिरहेको अवस्थामा घरधनीसहित ७ जना पक्राउ परेका हुन्। उनीहरूको साथबाट २५ हजार ४५० रुपैयाँ नगद र ३ गड्डी तास बरामद गरिएको प्रहरीले जनाएको छ।

यस्तै, लम्कीचुहा नगरपालिका–१ मोतिपुर बजारस्थित एक नास्ता पसलमा जुवातास खेलिरहेको अवस्थामा १४ जना पक्राउ परेका छन्। उनीहरूको साथबाट ५० हजार १६० रुपैयाँ नगद र ९ गड्डी तास बरामद भएको प्रहरीले जनाएको छ।

प्रहरीका अनुसार दुवै घटनामा पक्राउ परेकामाथि आवश्यक कानुनी प्रक्रिया अघि बढाइएको छ भने घटनाबारे थप अनुसन्धान भइरहेको छ।