साउनको अन्तिम सोमबार धनगढीका शिवालयमा भक्तजनको घुइँचो
धनगढी: हिन्दु धर्मावलम्बीहरूले साउनको चौथो तथा अन्तिम सोमबार आज श्रद्धा र भक्तिपूर्वक मनाएका छन् । भगवान शिवको प्रिय महिनाका रूपमा मानिने साउनमा व्रत, पूजा तथा आराधना गर्ने परम्पराअनुसार देशभरका शिवालयमा बिहानैदेखि भक्तजनको घुइँचो लागेको छ ।
साउन महिना धार्मिक आस्था र विश्वाससँग जोडिएको महिना मानिन्छ । विशेषगरी महिलाहरूले भगवान शिवप्रति श्रद्धा व्यक्त गर्दै साउन महिनाभर सोमबारको व्रत बस्ने गरेका छन् । घरपरिवारमा सुख, शान्ति र समृद्धिको कामना गर्दै विवाहित तथा अविवाहित महिलाहरूले व्रत बस्ने परम्परा लामो समयदेखि चलिआएको छ ।
साउनको सोमबार भगवान शिवको पूजा तथा आराधना गर्दा मनोकामना पूरा हुने धार्मिक विश्वासका कारण पनि भक्तजनहरू बिहानैदेखि शिवालय पुग्ने गरेका छन् । व्रतालुहरू हरियो पहिरन तथा चुरा–पोतेमा सजिएर शिवालय पुग्ने भएकाले साउनको धार्मिक वातावरणसँगै हरियालीको सांस्कृतिक रंगसमेत देखिने गरेको छ ।
पछिल्लो समय साउनको सोमबारको व्रत महिलामा मात्र सीमित नरही पुरुषहरूले पनि बस्न थालेका छन् । धार्मिक आस्था र व्यक्तिगत विश्वासका आधारमा पुरुषहरू पनि व्रत बसेर शिवको आराधना गर्ने क्रम बढ्दै गएको छ ।
सुदूरपश्चिम प्रदेशका विभिन्न शिवालयमा पनि साउनको अन्तिम सोमबार बिहानैदेखि भक्तजनको भीड लागेको छ । व्रतालुहरू शिवलिङ्गमा जल, दूध, बेलपत्र तथा विभिन्न पूजाका सामग्री चढाउँदै भगवान शिवको पूजा–आराधना गरिरहेका छन् ।
साउनको अन्तिम सोमबार भएकाले यस दिनको धार्मिक महत्व अझ विशेष रहेको भक्तजनहरूको विश्वास छ । महिनाभर व्रत बसेका महिलाहरूले अन्तिम सोमबार पनि पूजा तथा आराधना गर्दै पारिवारिक सुख–शान्ति, स्वास्थ्य र समृद्धिको कामना गरेका छन् ।
आधुनिक जीवनशैलीको प्रभाव बढ्दै गए पनि पुस्तौँदेखि चलिआएका यस्ता धार्मिक तथा सांस्कृतिक परम्पराले अझै निरन्तरता पाउनु धार्मिक आस्थासँगै संस्कृति संरक्षणका दृष्टिले पनि महत्वपूर्ण मानिन्छ ।
लक्ष्मण ढुङ्गाल, दिनेश खबरका संवाददाता हुन्। उनले समसामयिक विषयमा कलम चलाउछन्।