‘प्राविधिक कर्मचारी झन् भ्रष्ट’ — मन्त्री इङनामको गम्भीर आरोप, बिदाइमा आक्रोश
काठमाडौँः सहरी विकास मन्त्रालयबाट बिदाइ हुने क्रममा मन्त्री कुमार इङनामले मन्त्रालयभित्रको कार्यशैली र कर्मचारीतन्त्रप्रति तीव्र असन्तुष्टि व्यक्त गरेका छन्। उनले प्रशासनिकभन्दा प्राविधिक कर्मचारीहरू नै बढी भ्रष्ट भएको गम्भीर आरोप लगाएका छन्।
भूमि व्यवस्था मन्त्रालय सम्हाल्दा मालपोत कार्यालयका कर्मचारीमाथि कडा कदम चालेका इङनामले सहरी विकास मन्त्रालयमा भने अवस्था झनै जटिल र भयावह रहेको बताए। उनले उपत्यकाका मालपोत प्रमुखहरूलाई ‘साइज’मा ल्याएको चर्चा चलिरहेकै बेला सहरी विकासमा अझ गहिरो समस्या देखिएको बताएका हुन्।
बिदाइका क्रममा उनले व्यंग्यात्मक रूपमा भने, “म हारेँ, तपाईंहरू भोज खानुस्,” जसले उनको निराशा झल्काएको थियो। मन्त्रालयका सचिव गोपालप्रसाद सिग्देल र भवन विभागका महानिर्देशक रबीन्द्र बोहरासँगको असहयोगका कारण आफू आजित भएको उनले बताए।
मन्त्री इङनामले कर्मचारीको कार्यशैलीप्रति कडा टिप्पणी गर्दै कुनै दिन उनीहरूको कामकै कारण जीवनको सबैभन्दा पीडादायी अवस्था आउन सक्ने चेतावनीसमेत दिए। उनले आफूलाई ‘असफल र नालायक मन्त्री’ भन्दै आत्मालोचना समेत गरेका छन्।
संसद् भवन निर्माण ढिलाइप्रति प्रश्न उठाउँदै उनले समयमै काम किन पूरा नहुने र बारम्बार म्याद किन थपिने भन्ने विषयमा गम्भीर चिन्ता व्यक्त गरे। महानिर्देशक सरुवा गर्न खोज्दा सचिवले अवरोध गरेको र उल्टै आफूले घुस लिएको हल्ला फैलाइएको उनको आरोप छ।
प्राविधिक कर्मचारी र ठेकेदारबीचको ‘नेक्सस’का कारण २ देखि ५ प्रतिशतसम्म कमिसन चल्ने गरेको दाबी गर्दै उनले भेरिएसनलाई भ्रष्टाचारको मुख्य माध्यम बनाइएको आरोप लगाए। आर्थिक वर्षको अन्त्यमा ‘झोला बोकेर हिँड्ने’ प्रवृत्ति पनि रहेको उनको टिप्पणी छ।
त्यस्तै, सार्वजनिक जग्गा अतिक्रमण हटाउने क्रममा समेत अवरोध सिर्जना भएको उनले उल्लेख गरे। टोखा क्षेत्रमा भएको अतिक्रमण हटाउने प्रयासमा समेत प्रशासनिक हस्तक्षेप भएको भन्दै उनले असन्तुष्टि जनाए।
मन्त्री इङनामका यी अभिव्यक्तिले सहरी विकास मन्त्रालयभित्रको अवस्था र प्रणालीगत समस्यालाई उजागर गरेको छ। उनले उठाएका प्रश्न र आरोपहरू अब नयाँ सरकारका लागि चुनौतीका रूपमा देखिएका छन्।
