रास्वपामा मन्त्री छनोटको कसरत तीव्र, शपथअघि आन्तरिक छलफल चल्दै

काठमाडौँः नयाँ सरकार गठनको तयारीसँगै राष्ट्रिय स्वतन्त्र पार्टी (रास्वपा) भित्र मन्त्री छनोटको कसरत तीव्र बनेको छ। प्रधानमन्त्रीको शपथ नजिकिँदै जाँदा पार्टी नेतृत्वबीच सम्भावित मन्त्रीहरूको नाम र मन्त्रालयको संरचनाबारे अनौपचारिक छलफल भइरहेको छ।

पार्टी सभापति रवि लामिछाने र वरिष्ठ नेता बालेन शाहबीच मन्त्री छनोटका विषयमा प्रारम्भिक संवाद भइरहेको नेताहरूले बताएका छन्। संसद सचिवालयले चैत १२ गते नवनिर्वाचित सांसदहरूको शपथ गराउने तयारी गरेको छ भने त्यसलगत्तै दलको बैठक बसेर संसदीय दलको नेता चयन गर्ने तयारी छ।

रास्वपाले बहुमत नजिकको सिट प्राप्त गरेकाले संसदीय दलको नेता चयन भएलगत्तै राष्ट्रपतिबाट प्रधानमन्त्री नियुक्त हुने सम्भावना छ। पार्टीले चैत १३ गते प्रधानमन्त्रीको शपथ गराउने तयारीसमेत गरेको छ।

मन्त्रिपरिषद् गठनबारे रास्वपाले मन्त्रालयको संख्या घटाउने आफ्नो चुनावी प्रतिबद्धता अनुसार १५ देखि १८ मन्त्रालयमा सीमित गर्ने विषयमा छलफल गरिरहेको छ। विशेषज्ञता र कार्यक्षमतामा आधारित मन्त्री चयन गर्ने रणनीति अपनाइने नेताहरूले बताएका छन्।

गृह मन्त्रालयका लागि उपसभापति डोलप्रसाद अर्याल (डिपी) र महामन्त्री सुनिल लम्सालबीच प्रतिस्पर्धा देखिएको छ। सभापति लामिछाने अर्यालको पक्षमा देखिएका छन् भने बालेन शाहले लम्साललाई अघि सारेका छन्।

त्यस्तै, स्वर्णिम वाग्लेलाई अर्थमन्त्री बनाउने चर्चा बलियो छ भने प्रवक्ता मनिष झाले सञ्चार मन्त्रालयमा रुचि देखाएका छन्। सोबिता गौतमलाई कानुन मन्त्री बनाउने वा सभामुखको जिम्मेवारी दिने विषयमा पनि आन्तरिक छलफल भइरहेको छ। साथै, इन्दिरा राना मगरले पनि सभामुखमा दाबी प्रस्तुत गरेकी छन्।

अन्य नेताहरू शिशिर खनाल, विराजभक्त श्रेष्ठ, तोसिमा कार्की लगायतले पनि मन्त्री बन्ने आकांक्षा राखेका छन्। खनाललाई परराष्ट्र मन्त्रालयको जिम्मेवारी दिने सम्भावना रहेको बताइएको छ।

यस्तै, महामन्त्री कविन्द्र बुर्लाकोटीलाई मुख्य सचेतक र निशा डाँगीलाई सचेतक बनाउने विषयमा पनि पार्टीभित्र छलफल अगाडि बढेको छ।

समग्रमा, रास्वपा नयाँ सरकार गठनअघि सक्षम र सन्तुलित टोली निर्माण गर्ने तयारीमा जुटेको देखिन्छ।