यातायात कार्यालयका कर्मचारीमाथि दुर्व्यवहार गरेको आरोपमा एक जना पक्राउ
कञ्चनपुर: यातायात व्यवस्था कार्यालय महेन्द्रनगर, कञ्चनपुरमा कार्यरत कर्मचारीमाथि कार्यालयमै दुर्व्यवहार गरेको आरोपमा प्रहरीले एक जनालाई नियन्त्रणमा लिएको छ। बुधबार दिउँसो सहायक कम्प्युटर अपरेटर विमलबहादुर कुँवरमाथि दुर्व्यवहार गरेको आरोपमा प्रहरीले भीमदत्त नगरपालिका–१८ का हेमन्त चन्दलाई नियन्त्रणमा लिएको हो।
बुधबार दिउँसो ३ः३० बजेतिर कार्यालयमा प्रवेश गरेका चन्दले कुँवरलाई गालीगलौज गर्दै हातपातको प्रयास गरेको यातायात व्यवस्था कार्यालय कञ्चनपुरका सूचना अधिकारी रामदत्त भट्टले जानकारी दिए। कार्यालयमा प्रवेश गरी गालीगलौज गर्न थालेपछि केही समय कार्यालयको कामकाजसमेत प्रभावित भएको उनले बताए।
यद्यपि चन्द कार्यालयको सेवा प्रवाहको विषयलाई लिएर आक्रोशित नभएको सूचना अधिकारी भट्टले बताए। उनका अनुसार चन्दले व्यक्तिगत घटनाको विषयलाई लिएर सहायक कम्प्युटर अपरेटर कुँवरलाई गालीगलौज गर्दै हातपातको प्रयास गरेका थिए।
कार्यालयले प्रेस विज्ञप्ति जारी गर्दै सार्वजनिक सेवामा खटिएका राष्ट्रसेवक कर्मचारीमाथि हातपात तथा गालीगलौज गर्ने चन्दलाई कानुनी कारबाहीको दायरामा ल्याउन माग गरेको छ।
सहायक कम्प्युटर अपरेटर कुँवरमाथि हातपातको प्रयास गरेको आरोपमा भीमदत्त नगरपालिका–१८ का चन्दलाई महेन्द्रनगर बजार क्षेत्रबाट पक्राउ गरिएको जिल्ला प्रहरी कार्यालय कञ्चनपुरका प्रहरी निरीक्षक वीरेन्द्रसिंह थापाले जानकारी दिए। उनका अनुसार घटनाबारे थप अनुसन्धान भइरहेको छ।
