कैलालीमा मोटरसाइकलले गोरुगाडालाई ठक्कर दिँदा एक जनाको मृत्यु, दुई घाइते

धनगढीः कैलालीको कैलारी गाउँपालिका–३ मा मोटरसाइकलले गोरुगाडालाई ठक्कर दिँदा एक जनाको मृत्यु भएको छ भने दुई जना घाइते भएका छन्। हुलाकी सडकखण्डमा पश्चिमबाट पूर्वतर्फ जाँदै गरेको से ५ प ३४६५ नम्बरको मोटरसाइकलले सोही दिशातर्फ गइरहेको गोरुगाडालाई ठक्कर दिएको थियो।

दुर्घटनामा मोटरसाइकल चालक भजनी नगरपालिका–१ निवासी १८ वर्षीय सुजन चौधरी, मोटरसाइकल पछाडि सवार ५० वर्षीया ज्ञानमती डगौरा र गोरुगाडा चालक ५५ वर्षीय खुसीराम चौधरी घाइते भएका थिए।

तीनै जनालाई उपचारका लागि अस्पताल पठाइएकोमा मोटरसाइकल चालक सुजन चौधरीको धनगढीस्थित निसर्ग अस्पतालमा उपचारका क्रममा मृत्यु भएको प्रहरीले जनाएको छ।