गजल: यो राजनीति बडो गजब हुन्छ

(गजल १)
जब यो देश चलाउने आफ्नै देश प्रति गद्दार हुन्छ ।
हो यही अवरसवादी स्वार्थका लागि लम्पसार हुन्छ । 

यो खबर आफैमा यत्ति खराब लाग्छ मुटु काँप्छ मेरो, 
कति हेरेर बस्छौ सरकार ! जहाँ दिनहुँ बलात्कार हुन्छ ।

हे ! नारीहरु जाग,हे! मान्छेहरु हामी कहिले जाग्ने हौँ, 
यो त सानो नमुना हो हेर्नुस् अझै कति भ्रष्टाचार हुन्छ । 

न्याय यसरी मरेको छ पत्तो हुदैन कानुनी राज्यमा , 
कोही हत्या गरेर उम्कन्छ, चोरी गरेर फरार हुन्छ । 

पापीलाई नमर्दै सजाय दिनु पर्नेछ आँखाको सामु,
विश्वास छैन मरेपछि सजाय दिने कारागार हुन्छ ।

(गजल २)
तिम्रो बोली सुन्दाखेरी यस्तो लाग्छ जे हुन्छ अब हुन्छ । 
यो राजनीति हो हेर्नुस् राजनीति बडो गजब हुन्छ । 

समृद्धिको नारा दिएर देशलाइ कसरी खोक्रो पार्ने, 
आउनुस राजनितिमा तपाइँलाई पनि अनुभव हुन्छ । 

एक धोका तिमिले दिएर गयौ अर्को आफ्नै क्रान्तिले, 
त्यसैले भनिएको होला प्रेम अनि युद्धमा यो सब हुन्छ ।

यस्तो लाग्छ यो जुनिभर शान्ती समृद्धि हेर्न पाउदिन मैले, 
जाग हे मान्छेहरु जब तिमी जाग्छौ बिहान तब हुन्छ ।

रेशम राज बोकटी
दोधारा चाँदनी, कञ्चनपुर