माटोको चुलो बनाउँदा सवैले तारिफ गरे अव मुर्तिकलामै भविष्य खोजिरहेको छु (भिडियो सहित)

ढुङगाको काप फोरेर पनि उम्रिन्छ पिपल, श्रृजना शक्ती संसारमा कहिल्यै हुदैन विफल भने झै जुनसुकै मानिसको पनि श्रृजना ढिलो चाँडो प्रष्फुटन भएकै हुन्छ । तर जस्ले बालापनमै आफ्नो क्षमता पहिचान गर्न सक्छ त्यस्लाई भने सफलताको शिखर चुम्न ठुलै मुस्किल हुदैन् । धनगढी उप–महानगरपालिका वडा नम्वर ५ हसनपुरका दीपक लामिछानेले मूर्ति बनाउने सम्वन्धी कुनै पनि तालिम लिएका छैनन, तर पनि उनले बनाएको मूर्तिहरू हेरेर जो कोहीलाई मोहित बनाउने गरेको छ ।

सानो छँदा दौतरीहरुसंग खेल्ने क्रममा लामिछानेले माटाको चुलो बनाउने गरेका थिए । माटोको चुलो धेरैलाई मन परेपछि चुलो विक्री गर्दै लामिछानेले आफ्नो खर्च पनि उठाउन थाले । २०७२ सालको भूकम्प जानु पुर्व २ वटा माटोको घरहरू बनाएर आफ्नो मूर्तिकलाको विस्तारित रुप देखाएका लामिछानेले भूकम्पपछि एकाएक चर्चा कमाए ।

धरहरा सहित राजा विरेन्द्र, रानी ऐश्वर्या, शिव, पार्वती, गणेश, हनुमान, सरस्वती, दोधरा–चादनिको पुल, कर्णालीको पुल, ताज महल, स्वयम्भू लगायतलाई लामिछानेले मुर्तिकला मार्फत हुवहु उतारी सकेका छन् । विभिन्न विद्यालयहरुले लामिछानेले बनाएकै सरस्वतीका मुर्तीहरु स्कुलमा राखेका छन् । प्रदेश वाहिरका विभिन्न स्थानमा आयोजना हुने मेला महोत्सवमा प्रदर्शन गर्दा दोधरा चाँदनीको पुल र कर्णाली पुलको मुर्तिले निकै चर्चा कमाउने गरेको छ  
स्नातकोत्तर गरिसकेका लामिछानेसंग मुर्तिकला सम्वन्धीको औपचारिक ज्ञान भने छैन् । माटो बाहेक अन्य सिमेन्ट, फाईवर लगायतबाट मुर्ति बनाउने ज्ञान सिक्नका लागि अव मुर्तिकला सम्वन्धीको औपचारिक ज्ञान आर्जन गर्ने सोच पनि लामिछानेको छ । मुर्तिकला मार्फत नै प्रदेश नम्वर ७ का पर्यटकीय स्थलहरुलाई देश विदेशमा चिनाउने लक्ष्य लामिछानेको छ ।